Гьарай алатнавай са вечрел яман,
Цавариз килигиз лугьузвай : душман!
Акуна ам кIекрез, атана мукьвал ,
Жузуна хахадиз : вуч дерт ала вал?
Вучиз сад хьанватIа ваз йифер- йикъар,
Демекдай акъатиз атIана ахвар,
Вуна гьикьван ч1ав я хазамач кака,
Лагь ,вучиз экуьнлай ягъизва къакъа?
Вечре авадарна вилерин накъвар:
Ваз лекь аквазвачни ахъайна лувар
Дамахдив къекъвезвай вили къатара,
Виридаз чешне я ам и патара.
Чуьунуьхдач, к1анзава зазни кьакьанар,
Ая тIун виридаз и лекь таканар!
Рик- дуркIун гудай заз эвел масандиз,
Зи язух къвезмачни верчерин хандиз?
-Вунани зи дердер цIийи хъийимир,
Кар кьунвай хирерал гъиз кьел вегьимир.
Космонавт жез к1андай зазни са чIавуз,
Лекьер хьиз машгьур жен акъатна цавуз.
Иер кака хьанач, авайвал лугьун ,
Ваз жегьил чIавузни, бейкеф жемир вун,
Гагь халар аквадай хъиредин винел,
Гагьни хъиб жедачир лацадин къене.
Амма за гадардач -вун я заз азиз,
Ша, санал алахъин лекьрез кIуф ягъиз.
Чахъ мегер галачни адахъ хьиз лувар,
Тек садаз жедач гьа яйлахар, сувар!
Чибуруз ухшар туш адан къив гунар,
ЧIурзава секинвал, им яни гьунар?
Вучиз ам виридан мецераллатIа,
И зурбавилерин сирер вуч ятIа?
Къизгъин тир легьзеда ихтилат чилел,
Лекьер ацукьнавай кукIушдин кьилел.
Цавариз къвезвачир кIаникай ванер,
И пехилвилерин, атIузвай къенер.
КIекер, верчер амай гьелегьар ийиз,
Уьмуьрдин гьакъикъат рикIел алачиз:
Пелел алачирди виликни къведач,
КIекрекай садрани дагъдин лекь жедач!