Вун акуна заз а юкъуз,
Физвай шахдиз, хкажна кьил,
Саки валай къуват къачуз
КIвачин кIаник юзазвай чил.
Гьич элкъвенач вун зи патахъ,
Им вуч дамах , такабурвал!
Бахтавар я, хьана чIалахъ,-
Лагьана за вун акурвал.
Хъуьредайла хвешидаказ
Килигна за а вилериз,
Рапрапзавай къугъваз- къугъваз,
Варз акьазвай лепеяр хьиз…
Амма ана, кьатIана за,
Къалабулух дердер ава.
Гьинай къвезва залум суза,
Байих жезвач гьич садавай
Са чIавара кан хьанатIа,
Парабуруз белкини вун,
Амма жуваз вучиз ятIа,
Чир хьаначни ашкъиди кун?
АлатIани пIузаррал хъвер,
Якъин авач секинвал ваз,
Галамачни кIвачерик звер,
Йифди –югъди азаб чIугваз?
Туна вуна чанда юзун,
Дегишарна руьгьдин навар…
АкI чидай заз хушбахт я вун
Бахтаваррин са бахтавар!