Джер насыбынг болайым
Тебуланы Шукур
Ёшюнюнге къутас тюшюб, бурма чачынг,
Ангылатады ёсюб уллу болгъанынгы,
Салам бериб, алгъышладым кёргенимде,
Сюймекликни отун къаннга салгъанынгы.
Биз экибиз – джерге тюшген эки тамчы,
Чачылмайын бирге болуб кёл къурайыкъ.
Джюрек табхан джылы нюзюр бузулмайын,
Секиртмели шоркъа болуб биз агъайыкъ.
Хур джашауну джашлыгъында – сюймекликни –
Джер насыбы ачылгъанды бюгюн бизге.
Кюн келгенди: суучугъубуз къобан болуб,
Шоркъалары татлы макъам согъа кенгнге.
...Биз тюбешсек, суу тамчылай, бирча болуб,
Нюр кёзлеринг кёзлериме кюнча тийиб,
Эки джюрек бир-бирине ачылдыла,
Джомакъ джуртда ариулукъну бирге сюйюб.
Санга айтама энди келлик кюнлерими,
Джюрегими ачханса сен джарыкъ тангнга,
Гюл бачхангы кюн джылыуу мен болайым,
Болайым мен джер насыбынг, джаным, санга.