ЭЙ, САМУР ВАЦI
Гагь и пад яз, гагь а пад яз, эх тежез,
Эхир тежез, авай гьахъсузвилерин;
Са дуьз патахъ гьял ийидай рехъ тежез,
Эй, Самур вацI, ви дердер вуч дерин я?
Кьве гьукумдин менгенара гьат хьана,
Битав зи халкь, гьамиша яз сад хьавай;
Акур чIавуз, сергьятралди кьатI хьайа,
Лезги халкьдин вилер вили яд хьанвай,
Эй, Самур вацI, ви дердер вуч дерин я?
Алакъаяр агалнавай муькъеверал,
Къаравулар акъвазна кьве патани;
Ихтиярсуз, физни тежез мехъерал,
Халкьар акваз, эх тежер гуж ятIани,
Эй, Самур вацI, ви дердер вуч дерин я?
Чпин дертер къалин хьанвай пачагьриз,
Мажал авач, са гьахъ-дуван ийидай.
Я Сад Аллагь, куьз рехъ гузва гунагьриз?
Жагъур тийиз, кьве пай халкь сад хъийидай,
Эй, Самур вацI, ви дердер вуч дерин я?
Са хизан яз, гьар жуьредин миллетар,
Ихтиярар вирибурун сад тийиз;
Гьи кьадар вахт хьурай чIугваз зиллетар?
КIан туширла, виридан рикI шад ийиз,
Эй, Самур вацI, ви дердер вуч дерин я?
Эхир са къуз, акьалтна хъел, хьана сел,
Халкьарин вацI кьерилай алахьда.
Инкьилабдиз экъечIайтIа вири эл,
Вахт къвез кичIез, ивид хвалар авахьдай,
Эй, Самур вацI, ви дердер вуч дерин я?
Инша, Аллагь, ахьтин йикъал къвен тийин,
Сабурлувал къвен инсанрин рикIериз.
Чун сад садаз душманар хьиз жен тийин.
Мус къеда жал, - лугьуз чун дуьз рекьериз,
Эй, Самур вацI, ви дердер вуч дерин я?