ЧУН – ЛЕЗГИЯР
РикIин гафар меци лугьун, ван алаз,
Аквадайвал дагъларални чан алаз!
Къуй, чир хьурай, вужар ятIа лезгияр,
Дагъдин лекьер – лужар ятIа лезгияр!
Лезгидин тIвар,
Лезгидин кар,
Азадвилин
Рекьева!
Агъзур йисар гьахъ жагъуриз рекьера,
Азадвилин иви ргаз рикIера!
Чанар гана, кIарабралди сенгерра,
Ватан хвейи, чи чIал хвейи женгера!
Лезги тIварцIи,
Лезги - кIарцIи.
Гатай ксар
Йикьева!
Лезгияр - ягь, намус авай миллет я,
Къанун, къайда хуьн – лезгийрин адет я!
Чеб акъатай ери течир миллетар,
Гьикьван хьурай, кумун кьилиз къилетар?
Лезгидин гаф,
Михьи тир саф;
Мидаим яз
Винева!
Агъзур сарин ватан – женнет макан тир,
Шарвилийри хвейи дагълар кьакьан тир,
Кас гьуьл авай, лезгинкадин кьуьл авай;
Лензгияр яз, акьул дерин кьил авай,
Чун гьахъ акваз,
Сарар жакьваз,
Эх тежез, кьил
Чилева!
Лезги чилер, куьтягь тежер берекат,
Мел мехъерин, эл-адетдин мярекат!
Мугьманар – хуш, душманар буш, такIан я.
Мугьманриз – кIвал, душманриз сур – лакьан яэ
Шумудни сад,
Кьена са-сад;
Гьарма сад са
Лекъвева!
Лезгийриз кIан туш чуьруькар дявеяр,
Лезгийриз кIан туш ишехьун дидеяр!
Намусдив фу я нез вердиш инсанар,
Садрани хуш хьайиди туш нукьсанар!
Гузни куьмек,
Я чун зирек,
Гьи кас – каша,
Мекьева!
Гзаф чIалар чир хьун, гьелбет, хъсан я,
Амма, чаз чи дидедин чIал масан я!
Рагьберарни, алимарни шаирар,
Авазва чахъ, дуьнья авур загьирар!
Чахъ - булахар,
Чахъ - яйлахар;
Дагъ-аран, чахъ
Гуьнева!
Девиррилай девирралди камар яз,
Женгчи – аскер, мел-мехъерик – чамар яз,
Лезгистандин кьилин миллет – сад я ам!
Душманрив – хъел, яр-дустарив – шад я ам!
Беден – къуват,
Гъилер – такьат;
Дуьз крарин
Кьилева!
Зи лезги халкь - кьве патал, кьве пай авур,
РикIе даим хкахь тийир цIай авур!
Я рикI, беден, кьве паталди пай жедач!
Кьулан вацIун тIварни Самур – чай жедач!
Кьилер хкаж,
Ийиз акъаж,
Лезгияр - чи
Кьилевай!
Чун – дагъвияр, Урусат чи бине я,
Гьа кардалди чи халкьдин кьил – вине я.
Ватан патал экъич авур ивияр,
Гьич садан къачун тавур лезгияр,
Вили-вилихъ,
Гъалибвилихъ!
Чи кьисмет – чи
Гъилева!