Ракъинин нурар кваз алукьна гатфар,
Атанва чи патаз таватрин сувар,
Акатрай ниятрик, къастарик лувар,
Шад я къе, хъуьрезва цаварин къатар,
Квез сувар мубарак, азиз таватар!
Япара-хуш гафар, хайи авазар,
Квехъ галукь тавурай къаяр, аязар!
Кьисметди ракъуррай хвеш галай йикъар-
КIанивал- михьиди, уьмуьр- бахтавар,
Квез сувар мубарак, азиз таватар!
Миливал жедайвал иер вилера,
Хьурай куь гьар чIавуз цуьквер гъилера,
Ислягьвал, секинвал алаз чилерал,
Кьилиз акъатрай куь вири мурадар,
Квез сувар мубарак, азиз таватар!
КьатIунар хьурай куь къвердавай дерин,
КIани авсиятар ийимир серин!
Тебрикар лишан я мили гьиссерин-
Кьабула, ша, къенин паяр, савкьатар,
Квез сувар мубарак, азиз таватар!