Джумалаева Лулина лерина.
К1айн шифон т1ам ластийна, стиглара мархаш санна,
Хийланнан дог чахчийна, са дагош нехан а, сан а.
Ламанан йо1 яха цхьа г1ортор поэзех йожош,
Хала ду дош лаха, дог хилча валаро 1овжош.
Декъала хила хьо, маршонах йоьзна геланча.
Декьала хила хьо, син йозан говза илланча.
Нохчийчоь хьан дагчу хьуьнб1аран т1ум санна яра;
Дависа, хьо, марчо, хьуна-м тхо массо ду къера.
К1айн т1емаш ластийна, д1аяржи хьайн дегайовхо…
Хийла ахь хьистина, дац, Лула, латта, хьан довхо…
Дуьнен чу баьккхина ког дала мелана лоруш,
Халкъана даьгна дог боданехь чиркх хилла догуш,
Х1ара дуьне д1аг1ур ду замано чолхе йорт етташ;
Хьо дашца евзар ю бакьонех шийла мохь бетташ.
К1айн шифон д1аяьржи г1арг1улех тардина т1емаш…
Къастадеш к1айн-1аьржий, 1амий вай, бита цатемаш.
Роза Дахаева