Руьгьдиз пинеяр ягъиз

   
 
Эвел рекьизва зун, ахпа лугьузва:
Гъил къачу жедатIа, зиди я тахсир.
ДатIана вуна зав гъамар вугузва,
Кьинер кьаз гуьгъуьнлай пунар галачир.
 
Гила чун дустар туш, яни душманар,
Гила чи рекьерни чара я, чара…
Мах кьилиз акъатна, ахъая дакIар,
Гарарив гана вач гьиссерин хара.
 
Им вуч я, зи язух чIугвазва вуна?
Фикиррай акъуда, рике хутамир!
Вуна дердерикай пайдах авуна,
Куьмекар теклифиз хатур кутамир.
 
Зун вердиш туширни уьмуьруьз текдиз,
Байихрин алемдай фена яргъариз...
АцIукьда виликан секинвал хкиз,
ЧкIанвай са руьгьдиз пинеяр ягъиз…