Анихъ кьвазрай зи халкь,зи хуьр,
Зал пучнавай вичин уьмуьр,
Зи дидедиз акваз-акваз,
Гуьлле гурай дагълари заз! (К. Келентарви)
(ЧIехи шаир Келентар Келентарвидин экуь руьгьдиз)
Дердер хьана ви кьисметда датIана,
Шумудни са азаб кьилел атана,
Гьим гьахъди я, гьим нагьахъди кьатIана,
Гуьлле ганач…гуьлле гудач дагълари!
РикIин къеняй хиял физва алахьиз,
Алама зун кхьиз тежез, какахьиз…,
Гаф багьадаз дагъдин лекьрен кака хьиз,
Гуьлле ганач…гуьлле гудач дагълари!
Уьмуьр хьана вун паталди акъажун:
Лезгидин тIвар маса чIалал хкажун!
Такан женни сувариз рагъ акажун-
Гуьлле ганач…гуьлле гудач дагълари!
Бязибуру душмандин рикI шадарна
ЛагьайтIани «лезги пекер гадарна»,
Гьич садрани вуна касвал квадарнач,-
Гуьлле ганач...гуьлле гудач дагълари!
Кьуд патахъай вав чIанабур агатна,
Жувандакай жуваз душман хкатна,
Имтигьанрай чин ахъа яз акъатна,-
Гуьлле ганач…гуьлле гудач дагълари!
Шииратда маяк хьана кайидаз,
Гафаривди руьгьериз экв гъайидаз,
Жегьилзамаз «Лезги Пушкин» хьайидаз
Гуьлле ганач…гуьлле гудач дагълари!
Гьуьрмет жеда вичин абур хвейидаз,
Халкь паталди женг чIугуна кьейидаз,
Регьят ксус, «Ватан» лугьуз фейидаз
Гуьлле ганач…гуьлле гудач дагълари!