Хаза б1аьсте

 

Хаза  б1аьсте шен  бакъонаш  юьйцуш,
Йолаелла  1алам  хаза  а дан.
Х1ора дийнахь  кучамаш  а  хуьйцуш,
Д1аса  сетташ  кураллаш  а ян.

Гора б1аьсте, хьо ма серлаяьлла,
Дуьне  къаго  дагахь араяьлла.
Хьо  ма  г1ерта сан дог 1ехадан.

Сан даг чуьра  жималла  д1аяьлла,
Цхьанна  х1уманах дог ца 1ехало.
Соьга-м  цхьаммо къанъелла  ца аьлла,
Амма, тахана  дахар къена  го.

Б1аьсте, хьуна бехк билла ца ялла,
Ас лелочунна  хьо къинт1ера яла,
Хьоьца  доггах со ела ца ло…

Бьаьсте, бьаьсте, сан нана д1аяьлла,
Цо ма  даьхьи сан баьргийн серло.

23.04. 2019.

Стихотворение на чеченском языке о первой весне без мамы...