Уьмуьр яни им, бахт яни чаз гайи…
Регьят тежер им вучтин чаз т1ал гана,
Пад жезва рик1 акваз араяр къана
Жувни жувахъ галаз ава къал хьана…
Уьмуьр яни им, бахт яни чаз гайи,
Михьи гьиссер гьак1 гьавайда чи кайи?
Къалур тийиз, шехьиз, акъудзава йиф,
Мадни къалин сефилвилин ийиз циф,
Гила йисар я алатай вуч гьайиф…
Уьмуьр яни им, бахт яни чаз гайи,
Т1упар арадай къум хьиз, катна вахт фейи?
Кьезилариз жедачирни бес чувал-
Хиялрин пар - шт1уннавай ви к1улал,
Гьик1 эхна жал и кар рик1и ин ч1авал….
Уьмуьр яни им, бахт яни чаз гайи,
Жакьвадайла вун пад квачирдан сиви?
Гьинай яраб къвезвайт1а заз и къуват,
Вегьедайла камар - амачиз такьат,
Къизилдин са кьефес хьайила гъурбат…
Уьмуьр яни им, бахт яни чаз гайи,
Тахьайла зи патав чидайди къадри?
Зи къуватни руьгь вун я фад кьат1уна,
Дак1ан к1ус зун тушир хьи ви т1уруна,
Чизвани: яд кьадач хайи къапуна…
Уьмуьр яни, бахт яни им чаз гайи,
Михьи гьиссер гьак1 гьавайда ч1ух хьайи?