Гьикьван къе зи сефил я рик1,
К1анзавач заз ам къалуриз.
Ялгъуз хьана амукьин гьик1?
Гичинди хьиз къен ац1уриз.
Пехъи хьана пад жеда вун,
Жигер кьуна шел гьазуриз.
И дуьньяда сабур тахьун,
Экъуьгъун я, жув кьац1уриз.
Тажуб хьана амукьна зун,
Аламатдин кар акуниз.
Рик1 ч1арц1еллаз тежез кьат1ун,
Элкъвез беден лап ракьуниз.
Гила кьванни бесрай лагь на,
Гьикьван гъамар, дердер михьиз,
Ч1угвада на ахвар квахьна,
Дамардавай иви тефиз.
Гьик1 секинар ийида вун,
Экв аквазмач кьежей вилиз.
Фул гьатзава чанда сурун,
Накъварин сел физва чилиз.
Кваг вегьена храз кифер,
Икрамзава на кап1униз.
Цавай физвай лацу лифер,
Чара ая зи лувуниз.