Перишан вилерай гъам авахьзава,
Саки рагъ кьунва къе цифери цава…
РикIел хкизвани алатай чIавар,
Амачни ви танда а тIем, а такьат,
Вучиз вун пашман я, дагъларин тават?
Шегьерда уьмуьриз -шегьер кIан хьанач…
Зегьметар галачир бегьер кIан хьанач.
Сада ваз рикI ганач, сада чан канач,
Къадир течидайдал харжнани къуват,
Вучиз вун пашман я , дагъларин тават?
Иер я ви къамат, хци я кьатIун,
Эрзиман тир хьи заз садра вун акун!
Залан я ватандиз мугьман хьиз атун?
Гьич тахьай, зи гьиссер хутах аманат,
Вучиз вун пашман я, дагъларин тават?
Хъвер алаз пIузаррал шад хьурай гуьгьуьл,
Лепе гуз юзурай кIанивилин гьуьл!
Ша,зи рикI акъудмир, акъвазмир сефил,
Ваз кIани гьар легьзе -Билалаз савкьат,
Вучиз вун пашман я, дагъларин тават?
17.01.2019