1.
Лап тарифдин кьуьд атанва
Къе, дустар, чи шегьердиз,
Сувар себеб яз ч1аганва
Кьуд пад ина иердиз...
Акъвазнава зун дак1ардал,
Гьейран хьана и хъуьт1ел:
И суьгьурчидин гьунардал
Къе хьанва мад зун мягьтел….
Пурпу ц1верек1в нур гуз цава
К1валерилай элкъвезва,
Гьавадикай къуват, дава
Вири алемдиз жезва.
Зи дак1ардал, вуч дамах гвай,
Иер нехиш ат1анва,
Тарифдин, мурк1ад сачах квай,
Багьа гишир хранва.
2.
Мад зи аял вахтар рик1ел
Хквезва къе дат1ана:
Гару ягъдай гьик1 къув варцел,
Кьуьд гваз хуьруьз атана.
Йифди секин жедачир ам:
Вичин к1валах ийидай.
Амукьдачир я чуьл, я там:
Лацу кавал вегьидай.
Бажарагълу уст1арди хьиз
Иер нехиш ат1удай.
Агакь тийиз кич1еда хьиз
Къалабулух къачудай.
Ч1агурдай лап ц1ийи свас хьиз
Кьуд пад - вири т1ебиат.
Чир жедай аялдин рик1из,
Кьуьд хьайиди гьакъикъат.
Гьак1 амукьдай пагь ат1ана,
Килигайла куьчейриз,
Живед маргъалрив ац1ана
Акъвазнавай дерейриз.
И шикилар акур, аял
Кьаз жедачир гьич к1вале:
Нини ийиз катдай къаял,
Элжекарни гваз - гъиле.
К1ват1ар гадриз - ида адал -
Чи биц1екар къугъвадай,
Кьегьалар вац1ун мурк1адал
Чархар ягъиз аквадай.
Эллерар гваз тик гуьнеда,
Жедай к1ват1ал ц1иргъина.
Хвешивиляй чун хъуьредай,
Алабашни гуьгъуьна.
3.
Къуьнерихъ к1урт, бармак кьилел
К1ек1ецни гваз эрч1и гъиле
Ч1ехи буба фидай кимел, -
Чириз авай хабар хуьре…
Гагь ацукьдай ам к1анч1унал,
Са вил ягъиз балайриз -
Гьейран жедай ам къугъунал,
Т1уб ягъурдай гадайриз.
Шал алчудна туна юкьва,
Мекьи тахьуй лагьана,
Баде жедай - аваз к1ула -
Хтул биц1и дат1ана.
Живед к1ват1ар гвай чун акваз,
Биц1ек к1улай хъуьредай.
Миллиз-миллиз адав рахаз.
Бадед камар вегьедай.
Нянихъ жедай пичин к1ане
Баде мелер ахъагъиз,
Куьмекар гуз ашкъи къведай
Рушариз сар эвягъиз…
Бадеди чаз мах ахъайдай
Вервелаг-Верг халадкай,
Са гъилелди кьеб эч1ягъдай,
Сар хкудиз харадкай.
Гагь жедай ам чхрад к1ане:
Гамун гъалар ийидай,
Гагь сун гуьлуьт жедай гъиле -
Пине ягъиз - хъийидай…
Сувар юкъуз дадлу хуьрек,
Шуьреярни чрадай,
Лай-лайдал ксурдай биц1ек,
Иер гамни храдай.
Дишегьлидин сабурвилин
Чешне хьанай заз баде.
Гьуьрметдинни хатурвилин
Булахдин вич тир чешме…