Секинсузвал кутазва зак йифери
Зи экуьн гъед чуьнуьхнава цифери
За хуруда к/вал авунва гьижрандиз
Регъуь я заз вуч жаваб гун Ватандиз!
Яргъаз фейи заз са кьадар акуна
Уьмуьрдикайни за, базар авуна
Катиз-катиз фенат/ани хъсандиз
Жагъанач заз , жаваб гудай Ватандиз!
Мад суалри гатазва зи рехи кьил
Девлет хъсан яни , я зи хайи чил?
Жува-жуваз эцигай цал кьакьандиз
Сергьят хьанва , вуч жаваб гун Ватандиз!
За алцумай терездин хел кьат/ хьана
Зи хайи чил къимет авай зат/ хьана
Регьятвилер къачунай за зи чандиз
Гила чизвач жаваб, гудай Ватандиз!
Гьикьван тахсир кутан , къенин аямрик
Кьве гъиливди хуькуьрнай за гьарамрик.
Гьазур я къе , кич/е туш физ зиндандиз
Жагъиз хьайт/а , жаваб гудай Ватандиз!