Къениди я акъатай багъ -
Миллиз хъуьрез - вилера рагъ,
Дамах гвачир къени инсан-
Шиирратдал фадлай гьейран…
Ат1ана гьахъвал лугьудай,
Камаллу меслятар гудай,
Чирагъ я чи, ч1алан бике,
Халкьдин игит тарихд геле.
Гьай! акъатда къал къачурла:
Сайтарай «къаяр» акурла -
Сабур, савадвал, кьет1ен хат1-
Къилихдиз хас я, гуз къуват.
Гатун цик1из Ахцегь хуьре,
К1ват1 хьанвайла Къуба Куьре,
Кьисмет хьанай чи танишвал:
Шарвилиди туьшнай чун чал)
Гьуьрметдивди гьардав рахаз
Ширин мецел - акунай заз:
Инсанвилин дерин чешме,
Жегьилризни иер чешне.
Чи лезгивал хуьнин рекье -
Гьам шегьерда, гьамни хуьре -
Дат1ана ч1угвазва зегьмет -
Халкьдин патай къачу къимет.
Ви фикирар заз мукьва я:
Ваз хьиз зазни ч1ал багьа я.
Ви меслятар хуш я рик1из,
Гьахъ я абур кьиляй-кьилиз.
Лезги халкьдин рик1ин буйругъ –
Къениди хьуй ви гьар са югъ!
Сагъ чан гурай, яргъал яшар
Ац1ана илгьамд булахар!