Мата чес даъа туьгьметар -
Несиларис миннати.
Чел алчархьу зегьметар
Че биц1игунан кьисматий.
Дадар девг1ийъ ай иъ латай
Чин х1урари хьуни угь атай,
Кьу1рдин алух - ц1уре хьватай
Че биц1игунан кьисматий.
Шавалар алеф чаппар лат1у
Бахттлу ий лап алгъат1у.
Шумар-шалам муъул ат1у
Че биц1игунан кьисматий.
Фи ийчин дух1яй къанфит-ширин,
Т1аг1ам адай жагвар гунин,
Пайикес ат1уб к1илди дуйин
Че биц1игунан кьисматий.
Яхун хъу1си, уркъу улер,
Жандик кидай т1ушас гьунер,
Гъазе п1яжар, мархъвяр-бунер
Че биц1игунан сурсатий.
Къутармиш хьуб дек1ина чин
Зурба кар ий, фас акьай жин?
Чара акьуб фунис гашин
Че биц1игунан кьисматий.
Дуягь вей ахир тараш,
Кьу1ссе хьуни хьсати са яш.
Масан хъухьуб са сур лаваш
Мурад-Аллагь че кьисматива?