САЛАМ АЛЕЙК, ЛЕЗГИЯР!
Салам алейк, азиз дустар, дагъвияр,
Самур вацIун кьве патанни лезгияр,
Чун кьве патай атанва квез мугьман яз,
ГьикI яшамиш жезватIа куьн кIубан яз!
Чун и пата, куьн а патал, юкьвани
Каспи аваз, яз аквазва мукьвани.
Чи арада берекатлу гьуьл аваз,
Шадвилер чи сад я, лезги кьуьл аваз.
Къазахрин халкь, чи дагъвийрин стхаяр,
Са диндинбур язва мукьва архаяр.
Сулейманни Джамбуль тир шаирар,
Халкьдиз багъиш авур чпин магьирар.
Актавуда лезги халкьар, дустар яз,
Къалурзава гьар са кардин устIар яз.
Авар, дарги, къумукь, гзаф миллетар,
Кавказвияр ава, чIугваз зегьметар.
Чун къе иниз Сулейманан тIвар алай,
Райондай, куьн шад суварик кар алай,
Мугьман хьанва, авун патал мубарак!
Чахъни илиф, квез я даим ахъа рак!
И чIал лагьай Сажидин яз СтIалви,
Чи дамарра ава сад тир стIал ви!
Ислягьвилел зегьмет чIугваз, уртахар,
Сагъ хьурай чи лезгиярни къазахар!
ЗИ ДУСТ ГЬАЖИМЕГЬАМЕД
Яшамиш вун жезватIани гъурбатда,
Чални са кьил чIугвада гьар нубатда.
Чунни акур чавуз хъсан бубатда,
Хуш я ваз мад, зи дуст Гьажимегьмед!
ЛагьайтIани, гъурбатда лап хъсанда,
Заз чида, ви рикI авайди ватанда.
Чаз виридаз чи чилин руг масанда,
Чахъ авай сад, зи дуст Гьажимегьамед!
Къазахистан, Актаудин шегьердин,
Чун векилар тир СССР бегьердин.
Каспи гьуьлуьлуьв гватIан артух тегьердин,
Чими я гад, зи дуст Гьажимегьамед!
Актауда дустар шумад-сад ава,
Идрис стха, Селминат вах, мад ава.
Гьар йисуз чахъ берекатлу гад ава,
Хъша фад-фад, зи дуст Гьажимегьамед!
Гьар сеферда хтай чIавуз ватандиз,
Райондин кьил, Наримана хъсандиз
Кьабулиз хуш, кутугайвал инсандиз,
Ийизва шад, зи дуст Гьажимегьамед!
ВУН НАКЬ ВУЧИЗ АТАНАЧИР
Буллух эрекь, чехир вад сан,
Кьасабнай за жунгав шазан,
Вун атунал шад тир хизан,
Вун накь вучиз атаначир?
Ирид къажгъан – ирид къулал,
Биргендар кьвед суфрад кьулал,
Вун гьинавай икьван чIавал?
Вун накь вучиз атаначир?
Санал чIагъан, санал санал чуьнгуьр,
Пара хъсан межлис туькIуьр
Авунай за, Аллагь шуькуьр,
Вун накь вучиз атаначир?
Як аквазван ваз за инал,
ЧаранатIа накь шишинал?
Ала жеди ви вил тIуьнал,
Вун накь вучиз атаначир?
Аквазван ваз кьацIай рухвар,
Им пуд йиф я квахьна ахвар.
Ийидай за вунни тухар,
Вун накь вучиз атаначир?
Вири къуват ахъайна за,
Садакьа хьиз ам пайна за.
Элкъуьрдачир валайни за,
Вун накь вучиз атаначир?
Шаксуз кIвалин кIан хкатна,
Закни сурун фул акатна,
Къе ахлад, дуст, гьерекатна,
Вун накь вучиз атаначир?
ВИЛИКАН ФУРС ГУМАЧ ХЬИ, ДУСТ
Кумач сивик ерли рахун,
Кьурай къах хьиз хьанва яхун,
Жувакай жув ийиз кухун,
Виликан фурс гумач хьи, дуст?
|
Гьар са кIвалах пара хъсан,
ТуькIвенвай ви квачиз нукьсан.
Кьеж хкатна шумуд йисан,
Виликан фурс гумач хьи, дуст?
Ях фидайдаз тагуз салам,
Яргьа шивдай кьадай ви лам.
Дерин вацIа квахьна улам,
Виликан фурс гумач хьи, дуст?
Дуьз лагьайдал ийиз на хъвер,
БалкIанди хьиз кьадай рекъвер.
Сивин патай авахьиз гъер,
Виликан фурс гумач хьи, дуст?
Чарадан вил галай девлет,
Нез тадан кьван ам вав хевлет?
Къарши хьана гъамни зиллет,
Виликан фурс гумач хьи, дуст?
Таб ийидай гафун кьилиз,
Вун мах хьана хуьруьз, кIвализ.
Камар кьачуз куьлуьз-куьлуьз,
Виликан фурс гумач хьи, дуст?
Квез я гила кIватIай затIар?
Элкъвей чIавуз лакIабдиз тIвар.
Регьвер элкьвез, кумачиз твар,
Виликан фурс гумач хьи, дуст?
ВУЖ Я KIBAJIE ЧIЕХИДИ
-Вуж я кIвале чIехиди?!
Итим яни, паб яни?!
- Хъел атана хайиди,
Хуьрек не дай къаб яни?
КукIварна рак кIвалик квай!
Куьсруь хана кIаник квай!
Кац гатана вилик квай!
Хъел хкдна вичик квай.
Са геренда кис хьана,
Буьркьуь кьиф хьиз чилик квай.
-Вуж я кIвале чIехиди?!
Итим яни, паб яни?!-
Муьрхъуь кьуна хайиди,
Гуьндуьз яни, раб яни?!
Вичиз атай кIвал гана,
Папаз къачур шал гана,
Дана галай кал гана,
Багъламадиз тIвал гана,
Куьгьне яргъан кIватIна хьиз,
Хъелна фена къвал гана.
-Вуж я кIвале чIехиди?.
Итим яни, паб яни?! –
Инсан хьана хайиди,
Ички цадай къаб яни?!
Хизандивай чара я,
Уьмуьр вара-зара я.
Багъиш фейи ара я.
Гъам-хажалат пара я.
Хуьквез тежез мад кIвали,
Вични уьзуькъара я!
ГЬАРАЙ ГУЖ
-Яраб мад вуч ахквазматIа вилериз? –
Лугьуз са паб физвай чиляй-чилериз.-
Бязи сусар, ябни тагуз гъуьлериз,
Курортриз физ-хуьквезвалда, гьарай гуж?!
Я кІвал кIамач, я кал кIамач гьаятда.
Ихьтин сусан кьил кьада фу баятда!
Гаф лагьайла, са вацра кьве нубатда,
Хъелиз, хъфиз-хуьквезвалда, гьарай гуж!
Аял кIамач хурудилай нек гудай!
ЧIагурда вич лампади хьиз экв гудай.
Къаридив - кул, къужад гьиле пек гудай,
Туьтуькъуш хьиз къекьведалда, гьарай гуж!
Гьич вичикай хийир гун туш сусанди!
Партал - багьа, тIуьнар кIанда хъсанди!
Пул, зегьметар чIугуртIани хизанди,
Сусан гъилиз хуькведалда, гьарай гуж!
КIамач кIвале акьул гудай кьуьзуьбур!
Таяр-туьшер я адан-мег зизибур!
Эгер таб я лугьузватIа, на зибур,
Чир жедач квез аквадалди, гьарай гуж!
Лугьумир зун-сусаз акси къари я!
Чиди свас туш, женнетдин са гьуьруь я!
Сажидиназ вуч ийин, мез куьруь я!
Лугьуз тунач тух жедалди, гьарай гуж?
БАЗАР Я
Гьар затIунал - кьилин къимет,
Муьштерийри гатаз кьил-мет!
Вуч кесибди хьана кьисмет?
Эхиз жезмач - бизар я!
Мефтехурриз кIватIиз девлет,
Аламатдин базар я!
Жагьида квез карчни къуьрен,
Къизил балугь, къахни гьерен.
Кесиб-куьсуьб герен-герен,
Жедайди - бедназар я!
Дарман авай гьар са хирен,
Керематдин базар я!
Баку-лимон, Мары-кишмиш,
Агьзур нямет ава дуьзмиш.
Савдагарар хьана къизмиш,
Алверчивал - азар я!
Пул гвачирбур жедай пузмиш,
Къияматдин базар я!
Ни вичиз вуч лагьайтIани,
МетIер-кьилер гатайтIани,
АтайтIани, татайтIани,
Турпни чичIек, газар я!
Хъилер-путар атайтIани,
Гьукуматдин - базар я!!!