Къарагъ, кIватI хьухь, зи дустар,
Куьн илгьамдин булахдал.
Сумавардин, ша, чаяр
Хъван, мачхул жен кIвалахдал…
За бахшзава квез лувар
Гур илгьамдал элкъвезвай,
Квез къведайди шад хабар
Хьурай рекье къекъвезвай.
Саламат хьуй багърияр,
Куьн к1ани, квез кIанибур!
Хуьх адетар, манияр -
Чаз бажарагъ гайибур.
Цава авай чими рагъ
Атурай куь кIвалериз,
Цуьк акъатай гатфар(ин) багъ
Мугьман хьурай рикIериз.
Гъил фирай куь къелемдал,
ЦIийи шиир кхьирай,
Шадвилин нагъв кьекьемдал,
Шем хьиз руьгьдин, куьк1уьрай.
Куь илгьамдин булахар
Сиви-сивди ацIурай…
Тамар, дагълар, яйлахар
Куь шикилрал атурай…
Къарагъ, кIватI хьухь, зи дустар,
Квез пакаман хийирар!
Кьилиз акъатрай къастар,
Жакъурай дуьз жигъирар!