Зун са пеш яз к1андай зулун береда,
Багъри вилер жагъуриз гьар дереда.
Звер кутадай гару вичин аваздал,
Тек тежервал хъуьт1уьн залум аяздал.
Марф яз к1андай хайи чилел авахьдай,
Бегьер гана, ярдин хъел хьиз алахьдай.
Рагъ экъеч1дай тадиз цифер чукуриз,
Хважамжамдин ирид ранг чаз къалуриз.
Къуш яз к1андай, чархар гудай гьавада,
Манидалди т1ебиатдив рахадай.
Кефер патай мад элкъведай макандиз,
Шараг патал гьазур тир чан къурбандиз.
Сад Аллагьди халкьнава зун инсан яз,
И дуьньядин регьимлу тир мугьман яз.
Къуй махлукь хьуй инсанвалин шарт1ар квай,
Дуьз амалрин зурба тир са ктаб гвай.