***

Агь, зи яшар, куьне фад куьз зверзава,
Булахри хьиз, дагъдин хурай авахьдай?
Заз шикилрай жегьилвили хъверзава,
Вил галама а вахтарихъ алатай.
Гулангерек Ибрагимова

Яшар,йисар календардин чарар я,
Гьар са чарчяй са легьзеди зверзава.
Чаз тазвайди кьилин лацу чlарар я,
Вил акьализ,дуьзена чал хъверзава.

Межер вунни а яшарин къайгъуда,
Хьуй чlарарни кlани кьадар рехи лап.
Агуд мийир жуван рикlик чайгъунар,
Гьакl хьайила,вахт вич жеда пехил-вал.

Яшар физва лугьуз гьатна ясари,
Вучиз икl на жуван гуьгьуьл херзава?
Буш-бушина фенач хьи-а йисарай,
Ваз уьмуьрдин хуш макъамри хъверзава.

Са вун туш кьван яшар,йисар фейиди,
И дуьнья вич гьикl атана,гьикl фена.
Фейи уьмуьр гъилиз хквеч цlийидик-
Галамайдан кеф хкуда на гена.

Аку ваз а фейи къарин верцlивал,
Хтулар ви-пипlяй пипlиз зверзавай.
Тlимил ая на памбагдал кьецlивал,
Ашкъи аку кlанидан-ваз хъверзавай.
25.09.18 г.