За алцумна гьар са мензил алемдин,
Мукь жагъанач гьич зи руьгьдиз архайин.
Къуй дарман хьуй багъри накьвар Ватандин
Чи уьзуьрриз: рик1ин дердер ахъайин.
Нур чук1уриз, чим гузава веледриз.
На лугьуди, хайи диде гелкъвезва.
Эхь, икрамиз вуна ч1угур зегьметриз,
Зун гъурбатдай мад ви патав элкъвезва.
Хуп1 ярашугъ, ширин ванцел булахрин,
Физ ахвариз бубад чилел, маканда.
Къацу махпур ачух, буллух яйлахрин
И дуьньядин хазинадлай заз к1анда.
Пак дагъларин рехи кьилел экъеч1дай
Рагъ дава я къанни ц1ипуд миллетдин.
Чан эцигна, кар-к1валахдив эгеч1дай,
Халкь зурба я, чешне хьанвай гьуьрметдин.
На хуралай чаз багъишай няметрин
Дад рик1елай чи садрани алатдач.
Чун паталди вуна хвейи девлетрин
Даим уьмуьр тариф ийиз галатдач.