Къизил, гимиш, мержанар,
Емиш-майва, девранар-
Къужахдаваз тахтуна,
Йисан ц1ийи вахтунал,
Т1ебиат къе вил алаз,
Акъвазнава зав рахаз:
"Абукевсер булахрин,
Хъипи ипек яйлахрин,
Гурлу вац1ун гьамга яд-
Гьазур я ийиз къурбанд."
Яру махпур алук1на,
Девлетлу зул алукьна.
Хуп1 дуьнья хьиз махарин
Ава суьрет тамарин,
Суьгьуьрда тур дагъларни
Хважамжамдин рангари.
Зулун аваз- япара,
Пешер къугъваз цавара.
Чешме я зул илгьамдин
Яратмишдай инсандин.
Пак алемдиз гьиссерин
Ч1угунава эсерди.
Мад сеферда вил алаз,
Зунни къвазда, вав рахаз.