Я заз таниш туш симерин зурзун,
Я вав чуьнгуьр гвач вегьена хурал,
Ахъа пенжердив акъвазнава чун,
Рик1яй тикрариз манидин са ч1ал.
Энгел хьана къе рагъни хъфизвай,
Туракь санжахра ама зи кифер,
Зи сирлу хиял женжелдиз чизва!
Агь, и жегьилвал, к1анидан кинер!..
К1вале серин я, рагъни хъфена,
Ви ч1улав вилер гьуьл хьиз аквазва,
Зи чин, ялав хьиз, кузва ифена,
Чуьнгуьрдин сим хьиз, зун куьз зурзазва?
Къе ашкъидин сел гъалиб хьурай зал,
Тек са гъетериз чирда зи сирер.
Кьезил пердеяр юзазва гарал,
К1вализ чк1анва чуьнгуьрдин сесер.