***

Са шумуд виш йисариз,
Арабринни фарсари,
Магъулринни туьркери,
Къудуз чlакьал,сикlери,
Гьарамзада патанди-
Тарашна хьи,Ватан зи.
Гагь шагь,гагь султан хьана,
Гагьни паша,хан хьана.
Халкь зи гъвечlи акуна-
Ам лап ажуздай кьуна.
Буьркьуь хьайи вилер а,
Вегьена чи чилерал.
Кьушунар къана луж-луж,
Паравал тир абрун гуж.
Муьтlуьгъариз кlан хьана,
Абури гзаф чан кана...

Амма...ягъал хьайиди,
Гъалат къарар гайиди
Чирна абруз дагъвийри,
Туна алкъан ивийри...
Хьанатlани сан гзаф,
Чиди хьана эхир гаф...
Гьайиф хьанач чаз чандин,
Азадвилихъ-Ватандин.

Пара ятар авахьна,
Чи тарихар квахьна,
Къе,алахъиз алимар,
Барпазава илимар.
Гьар чкадай са мискьал
Ахтармишиз я кьал-кьал.
Баркалла хьуй абруз мад-
Хъийизвай чи тарих кlватl...
Заз лагьайди и къиса,
Гьахьтин викlегь са кас я...

Шумуд са асир вилик,
Кваз фарсарин гъилик,
Хьанвайди я и къиса,
Лугьун-яргъи тийиз,за...

Фарсар атай бере тир,
Азад-са дагъ-дере тир.
Халкьдин викlегь рухаяр,
Гваз яракь-чухаяр,
Хкаж хьана дагълариз,
Мукьал-мукьал къалариз,
Басхасариз ягъидал,
Алудиз тир ивидал.
Аран-дуьзда амайбур,
Шагьдин гъилик кумайбур,
Са гьал вичин кьил хуьз тир,
Никер цана,къуьл гуьз тир...
Чара атай чкадал-
Нуькервални ийидай...

Къунши кахет княздиз,
Ийер са руш аваз тир.
Рушни руш гьа-са пери,
Вич хьизни,тир тlвар-Пери.

Гьикl ятlан,са уьтери,
Акуна шагьдиз Пери.
Шагьдиз ахвар амукьнач,
Ам вич-вичив гумукьнач.

Дили хьана ашкъинай,
Мугьуббатдин тештинай
Яд хъвана шагь Абаса,
Гуз гьазур тир тахт маса...

За квез имни лугьун хьи,
Азад чил тир Кахети:
Шагьди илчи къаналда-
Периди гаф ханалда.

Шагьдин нуькеррин къене,
Фарс тушир-йери,бине,
Авай дагъви са бенде-
Чидай гьар жуьре фендер...

Мегьтервализ авайд тир,
Викlегьвилер квайд тир.
Лезги тир ам-цlахур тир,
Вичин тlварни Шахмур тир...

Шагь Абаса фикирна,
Ингье-план туькуьрна:
Мегьтер твада гъавурда,
Пери катриз ракъурда...

Мегьтер рекье гьатунни,
Пери гваз катунни,
Гьич жедач кьвед гатун йиф,
(Атанчирни ваз гьайиф-
Руш катарна,залум,на,
Икl ягьсузвал малумна?!)
Шагьди бегвал ганалда-
Шахмураз кlвал хьаналда.

Амма Пери-бахт такур,
Чукlулдивди вичин хур
Яна,падна,кьеналда,
И дуьньядлай феналда.
Рикlиз кlани гадани-
Эхи хьанач адвайни.
Гьатна дили Межнун хьиз,
Кахетидин чуьллериз...
05.05.18 г.