Са пис карни арадал гьич алачиз,
Жизви кьванни ягъдай тегьне авачиз,
Я рехнени кутадай зак галачиз,
Вучиз вуна зи рик1 т1арна, к1аниди?
Эвич1дайла вун явашдиз гуьнедай
Пак мурадар гъайиди хьиз Меккедай,
Ракъинин нур агакьдай зав, хъуьредай..
Бес гила гьик1 сефиларна, к1аниди?
Вун зав миллиз, мелекдив хьиз, рахадай
Ви гафари гужлу лувар кутадай -
Ашкъи рик1е бахтавар яз къугъвадай,
Вучиз вуна зи рик1 т1арна, к1аниди?
Патав гвайла мич1и йифни экуь тир,
Вири алем жедай марвардин атир,
Билбилдин сес алайди тир чи жигъир…
Вучиз вуна зи рик1 т1арна, к1аниди?
Къизилгуьлер гъиле аваз атанай,
Виридалай багьа я зун лагьанай,
Жуван сирер ахъайна зав вуганай…
Вучиз вуна зи рик1 т1арна, к1аниди?
Дерт ахъайдай са кас кьванни патав к1анз,
Йифер-йикъар акъудзава за пар гваз.
Йикъар физва хиялрик кваз, ахвар хаз...
Вучиз вуна зи рик1 т1арна, к1аниди?
Фото с Интернета