(шой мехкаха баьнна, ара дlа-хьай баьржача гlалгlай илли)
Рузкъан кхело меттардаьха,
Дуне мелда дlадаьржа,
Лелаш да вай, гlалгlай, цхьалха,
Гlалгlайченах дог lайжа.
Гlийла хьеж вай Даьхе тахан
Хийрбаьннача дезалга.
Кхетадеш да цуна бахьан -
Да из дезал безалга.
(тlехьа оалар)
Баха, баха, ираз кхаба,-
Даймохк,- дуне мелла дах.
Хьай беркатаца хьо беба,
Гlозабоахаш цунца нах!-
Мелла гаьна тхо даларах,
Хьона ловца оаха боах;
Хьоца безам тхой хиларах,
Хьо хестабеш илли доах.
Гlалгlайче! Хьа маьлха сердал
Массанахьа тхоца я.
Чlоагlъеш тхоашта юкъе мерзал,
Хьа цlи лакха кхоабаж я.
Довзаш наьна метта дозал,
Тхо укх ара дахаш да.
Лаьгl ца долийташ тхой вошал,
Хьа кхуврчан тlа дерзаргда.
(тlехьа оалар)
Баха, баха, ираз кхаба,-
Даймохк,- дуне мелла дах.
Хьай беркатаца хьо беба,
Гlозабоахаш цунца нах! -
Мелла гаьна тхо хиларах,
Хьона ловца оаха боах;
Хьоца безам тхой хиларах,
Хьо хестабеш илли доах.
23-24.05.18.