Квар къуьневаз, свас булахдал
Акъудзава къе дамахдал.
Вири шад я и кIвалахдал,
Им чи лезги са адет я!
Къуьневай квар гимишдинди,
Свас къелем бул емишдинди,
Вични къветрен еришдинди,
Вили ямир, квез минет я!
Булахдин цяй ацIуру квар,
Сад Аллагьди туькIуьруй кар.
Келегъадин луварик гар,
Им чи лезги са адет я!
Булахдин яд кварце хьурай,
Гьуьрмет вини кIарцIе хьурай,
Свас бахтарин цIарцIе хьурай,
Вили ямир, квез минет я!
Свас хтана, квар гваз ацIай,
Фад, къажгъандин къизмишра цIай.
Мубаракар лугьун мецяй,
Им чи лезги са адет я!
Суса гъайи булахдин яд,
Шуьрбетдин хьиз ширин я дад.
Акъатайла чи сусан ад,
Вили ямир, квез минет я!