Ви вилер накь зи вилера акьуна,
А деринрай ви сир - гьиссер акуна,
Рик1ин симер а гьиссерри къарсурна
Мад вилерай умуд вуна къалурна.
Амма умуд вучтинди хьуй, к1аниди,
Чи кьисметар патаривай фейиди?
Гьик1 ят1ани алемда заз вун ава
Яргъалайни вун акурла бахтлу я.
Чи ниятар вили цав хьиз михьи я
Такурла вун экуь дуьнъя мич1и я
И гьиссер чаз цаварилай савкьват я
алакьунрик лув кутазвай къуват я.
Уьмуьрда зи тек са легьзе амай кьван
Хайи чилел жедалди са къайи къван
Хуьда рик1ин деринра за и пак сир-
Гьиссерикай хьуй чи мугьуьбатдин п1ир.
Ви вилер накь зи вилера акьуна,
А деринрай ви сир - гьиссер акуна,
Рик1ин симер а гьиссерри къарсурна -
Агь, вилерай вучиз умуд къалурна.