Вуна гайи темендин гел алама зи пlузарал,
Гъил алтаднай явашдаказ на зи чlулав чlарарал.
Килигайла вун вилериз, са гаф лугьун тавуна,
Ви вилерай гьасятда за вири гафар кьатlуна.
Акъуд тийиз са келима туна вуна зун рекье -
Яраб гьихьтин гафар авай захъ кузавай ви рикlе?
Заз лагьайтlа ви къужахдиз кlан хьанай мад гьахь хъийиз,
Ахъаймир зун, зун рахкурмир, фад хутаха чи кlвализ.
Вили цавун аршда за ваз жуван шиир кхьизва,
Вилерилай селлер хьана туькьуьл накъварни физва.
Рикlин са пай туна зун къе лап яргъариз хъфизва-
Яваш жезвач зи сефилвал - тlурфан хьана къатизва.
Куьз герек я и тlарвилер - са уьмуьр я чахъ авай?
Жегъин тийиз са жавабни, эх жезавач гьич завай.
Гьикьван хьурай: вири уьмуьр вил рекьеллаз акъатна?
Аквада жал - кьвед лагьай пай хьайит1ани - агатна?
Артух жезва, аквазва заз, арадавай мензилар...
Рикlел хкин хуш легьзеяр - белки жен пар кьезилар?
Вилерикай бахтлу вахтар гьасятда зи карагна,
Циферикай рагъ зи вилик нур вегьена къарагъна...
Заз ак1 хьанай ам зи рик1ихъ гьа легьзеда агакьнай -
Зи гуьгьуьлар хъуьтуьлариз адлай жизви алакьнай.
Пlузараллай темендин чим за гилани кьатlузва,
Зун хкведа мад ви патав, зи рикlи ваз лугьузва.
12.05.18