Рази я зун, хьуй ч1ехи вах,
Агудайди чун я лезги "Булах".
Гатун са юкъуз чун кlватl хъжеда мад
Кlел ийиз шиирар, ийиз рикlер шад.
Асул шагьид яз, гьахъвилинни тахт
Са камаллу шеъ яз, чир хьана , вич вахт:
Дуьздал акъудда вахтуни пис хъсан -
Ваз дуст-душман яни къалурда инсан.
Чунни я вахтуни агудай дустар
Шаирар - лезги халкьдин чун векилар.
Мукьвавал авай туш чаз са ивидин,
Амма мукьвал я чун хел хьиз сихилдин.
Шииратдин бахш я стхаяр, вахар,
Рик1ин дегьнейрай кхьизвай ц1арар
Чи вилик квайди я "Булахд" чешме -
Алахъда чун жез шаирриз чешне.