Секиндиз физ авай зи йикъар, йифер,
Гьинай акунай заз а чIулав кифер…
Нурар элкъуьрна зал чукурна цифер,
ЛукI тир гьиссерикай ханарна вуна,
Вучиз заз жув икьван кIанарна вуна?
ГьикI дегиш жеда вун, дагъдин гьава хьиз!
Гагь са чарчар хьана, ятар алахьиз,
Гагьни са цIайлапан - ялав алахьиз,
Гагь чIухна, гагь рикIер-чанарна вуна,
Вучиз заз жув икьван кIанарна вуна?
Акъудна зи ругьда канивилин гел,
Ваз гьар гафуникай гила къвезва хъел,
Тегьнеяр, туьгьметар гъизва хьи мецел…
Хъуьтуьл тир ви рикI бес – къванарна вуна?
Вучиз заз жув икьван кIанарна вуна?
Ваз чизвай, зиди жеч а иер вилер,
Садра арушдач зи гардандал гъилер,
Бес вучиз ракъурна ашкъидин селер
«Зун види, види я» – ванарна вуна,
Вучиз заз жув икьван кIанарна вуна?