Къалуриз алахъна вун, вучиз ятIа,
Тапаррин туькьулвал, верцIи бегьер хьиз,
Канивал ви рикIе са кIус аватIа,
Зи гафар акуна вучиз зегьер хьиз?
Валай гъавурдава и руьгь, и къелем,
И чарар, ктабар гъамари кьунвай,
ЛипIлипIиз туьхуьрай гьиссерин алем,
Къайи гарарилай вуна заз тунвай.
ТIвекI авай луьткве хьиз гьуьлуьн ятара,
Чалухиз ама зун, умуд атIана,
Вуна хуьх таканвал дегьне къатара…
Хквез кан жедатIа, тахсир кьатIана?
Амма мад ахквадач зи азабар ваз,
Акъудда за ругьдай гъулгъула-зурзун!
Вуна давам хъия ашкъидив къугъваз,
Нихъ галаз ятIани… амач гила зун…