За ви шикил ч1угвада
Хважамжамдин рангарал,
Зун, мелек, вав рахада
Вегьез гъетер ч1арарал
Рапрап гурай гъетери,
Зи мелек, ви киферал.
Чи милаим гьиссери
Муьгъ эциграй рик1ерал.
Ихтияр це вегьедай
Лацу дуьгуьр къуьнерал.
Гьар жигъир вун къекъведай
Элкъуьрда за цуькверал.
Ви дуьгуьрдин ц1илери
Лифери хьиз лув гузва.
Гарал къугъваз мекери
Зун махуниз тухузва.
Ви кьат1унри, вилери,
Желбзава зи гьар фикир.
Гъиле авай цуьквери
Чук1урзава хуш атир.
Гьатнава зун суьгьуьрда
Чун чаз акур ч1аварлай
Шем ят1а заз куьк1уьрай
Зи уьмуьрда- цаварлай?!