(Музе)
Я Гуьлхалум-Гуьгьуьлхалум,
Хъел яни вун зав?
Шумуд югъ я рик1 хьана мум,
Кьазвач на зун кав.
Хара-хара хурукзава
Гирт яван гафар,
Т1уьруькьуьм гуз, чуьруькдава
Гьижаяр-гьарфар.
Гьик1 ава заз, ракъини экв
Хгузмач ерли,
На лугьуди, амач герек
Чилел зи лирли.
Рик1 фашалда руг авуна,
Кьуранва зи мез,
Зариятда, цуьк авунвай,
Ат1айди хьиз сес.
Ша, илиф захъ! Вахтар ама,
Вегьемир гежел.
Чан хкведа - гатар ама! -
Гьиссерал женжел.
Пак рик1ерай иблисдин пай
Акъудда чна,
Пак муьгьуьббат силисдикай
Хкудда чна.