Лезги чилел дагълар ала такабур,
Лезги чилихъ ава ширин булахар.
Амма са дагъ ава булах ва абур,
Кьведни авай - гьам чIалар, гьам кIвалахар.
Белки а кас ятIа шаир Ханбиче?
Лезги чилихъ ава чуьллер цуькверин,
Атирламиш ийидай чил, цаварни.
Хабар кьадай гьаларикай рикIерин,
Шииратдин ава_адахъ луварни.
Белки а кас ятIа шаир Ханбиче?
Соннетрин таж храз лезги чIаларин,
ЭвичIзава чIалан дерин къатариз.
Сирер чириз уьмуьрдин серт гьаларин,
Берекат бул гъизвай халкьдин гатариз.
Белки а кас ятIа шаир Ханбиче?
Сажидиназ чида къадир къизилдин.
Сажидиназ чида къадир гафарин.
Заз ван къвезва лезги вахан - билбилдии,
Муштулухдин шад хабар гвай гатфарин.
Белки а кас ятIа шаир Ханбиче?