Хъипи цуькверин рик1. Таибатан рик1. гьикая

Ахъа бул бегьердин ципиц1ламиш хьанвай чуьллери, къайи булахри , к1амари, кьакьан гьулдандин дагълари ва экуьнин ракъинин ц1арц1ар гузвай нурари, гьар жуьредин атирлу цуьквери, вили къашунин рангуни, цава авай, манияр лугьузвай къушарин ванци Таибатан чанда ашкъидин эсердин руьгь твазвай. Ам гзаф дуьньядал рик1 алай, шадвал гувай, рик1 михьи инсан тир...адан къизилди хьиз нур гузвай хъипи ч1арарин киф, лацу къирдин к1усунал к1ут1унна къуьнелай гъуз вегьенвай. Ада вичин к1вачерал алай, дидеди къачур , хъукъвай ч1уларин, ракьар квай сандалар хт1унна, хранвай кифни тадиз ахъайна, кьец1ел к1вачерал, цуьк акъатай, таза векьерай т1уз гъилерни цавуз хкажна, са гуьрчег ванцелди манияр лугьуз -лугьуз чамар гуз гат1умна.....Гьар са цуькведилай, векьедилай, чилин, вичин хайи чилин накьвадилай, жуван макандин гуьрчегвал къачузвай вилералди, вичин ругьдалди....Заз ак1 авай хьи, ада исятда гьа и гьавада, лув гуда.. Заз вучиз ят1ани чидачир, къе физ к1анзавачир чуьлдиз...Гьикьван тапарар туьк1уьр авунат1ани, Таибата зун рекьив гъана. Садлагьана рахай цаварин ванцел чун къарсур хьана...Чаз гьич хабарни авачиз, нисинин береяр хьанвай.. Цавар ат1угънавай, на лугьуди ч1улав лекьер к1ват1 хьанва...Зи хъуьхъвел аватай ст1алди хабар гана, гьа исятда са сел вегьеда...Гзаф марфадал рик1 алайвилиляй чна япалайни авунач, амма кьиле фикирар амаз са вижевай сел къвана..Чун хкадриз, марфадик кьуьлер ийиз - ийиз рекье гьат хъувуна...К1вачерикай т1уз рагъул, къати селлерин хулар физвай... К1вачер эцягъиз ятарай, жува жуваз я мани тушир, я гафар тушир рахунар ийиз гат1умна Таибат. Адал алай читдин перем са гуьрчег къекъуьнрин нехишар алай, куьц1ена алк1анвай ..Зак са пис зурзун акатна, сарар срарал текъвез авай, Таибат, ваз мекьизвачни, лагьана жузуна за адавай.. амма Таибатаз на лугьуди, зи ван къвезвач..адан вилер к1амун а патай, хъипи кьарад цуькведилай алатзавачир.. "Килиг, килиг..адан гуьрчегвилиз килиг.. На лугьуди, рагъ чилел аватнава", шад тир ам...За Таибатаз лагьана: " Гьич фикирни ийимир, ша чун фад- фад хъфин"... "Иниз кьван атайла, са цуьк кьванни гвачиз хъфидани к1вализ", - лагьана Таибата...Сел генани къати жез гат1умна..Гьамиша мукъаятлу зун, къе ажал галайвиляй Таибатахъ яб акална, к1амуз кьван, гьадахъ галаз фена..Амма Таибат, лув гайиди хьиз, залай вилик к1амув агакьна.. Фикирни тавуна, перем кьеженвайди, ада ам мет1ерал кьван хкажна, экъеч1на а патаз..Таибата цуьк ат1ана цавуз хкажна, сивел хъверни алаз са къадам вегьена циз, к1вач цикай хкуд тавунмаз, винидихъай са т1урфан кьилел алаз, цавай хьиз, еке хвахвар квай, к1ам атана...Зай са гьарай акъатна..Таиииибаааат..!!!! Зи ван адал агакьдалди, ам селди яна, вичин хураваз тухвана..Зун са къерех кьуна, гьарайдалди адан гуьгъуьниз катна. Куьмек тежерди чир хьайила, за чамарна хуьруьз хъфена, кимел алай инсанриз лагьана..И мусибатдикай хабар хьайи инсанар вац1ун кьерех тирвал кьуна, къекъвез гат1умна... .Са ц1уд минутни алатнач, цава рагъ пайда хъхьана.. Хважамжамдин рангар илисай муьгъ вегьена, хуьруьн и патай а патаз.. Лап йифелди кьван къекъвенат1ани, жагъанач..Пакаман лап сегьердалди инсанар са умуд кваз, мад рекье гьатна. Хуьруьн лап эхирда авай, муькъуьв агакьайла, Ажибаладай гьарай акъатна ( Ажибала, Таибат к1анзвай къуншидин гада тир...Таибата адаз гаф ганвайди тир, к1анибур гзаф авайт1ани, садазни фидач вун авай чкада, лагьана...Аквар гьаларай, кьисмет хьанач ам, Ажибаладиз.. ) Инал ша вири,- гьарайна. Муькъуьн к1аник квай..адан вилерилай т1уб- т1уб накъвар физвай..Симинихъ пек хьиз галк1анвай Таибат акур инсанрай, пагь акъатна амукьна... Адан ракъинин ранг алай ч1арар , нур гузвай ракъин хьелер хьиз, экуьнин михьи хьайи, цин винелай т1уз чк1анвай, гъилени т1арамдиз шуьткьуьр хьанай цуьк кьунвай. .на лугьуди ам адан рик1 тир, вичик лагьайт1а, сагъ чкани кумачир.. Йифдини са вил ахвар тахьай, югъдини селдик акатай зи чанда, акваз -такваз ифин гьатна, .амма заз зун аквазвачир -..рик1е авайди Таибат тир зи..Къуншидал алай Сабина духтурди раб яна заз хъфена ...Зун экуьнин к1екрен сесинал ахварай аватна..Заз гьик1 хьана, заз вири ахварай акурди хьиз. ..амма зи гъилерал, к1вачерал хьанвай гелер акурла ...зун гъавурда акьуна, ахвар туширди...Вири рик1ел хквез гат1умна... Чун исте къугъвадайвал...чун сад садахъ галачиз санизни физвайди тушир...чуьллериз, мечер гъиз, цуьквер к1ват1из, межлисрик.. Гьатта Ажибаладихъ галаз рахадайлани, зун тхузвайди тир вичихъ галаз.....Гила заз зи са пай амачир хьиз ава...са куьникайни т1ям хквезмач..Ажибалани , дуьньядикай пер хайиди хьиз ава..гьамни язух къвер кьван, рекьизва зун....Я вилерикайни ам вац1у тухвайвал хкатзавач, гзаф рик1е ак1анва зи... Дидедин ванцел, зун зал хтана ".Бес я ,чан руш.,.гьикьван на адакай фикир ийида, гьикьван яс ч1угвада... хьана, Аллагьдин кьадарар я, чан руш"...Эвердай ванцел зун къецихъ экъеч1на, ам Ажибала тир...Гила гьамиша гьа и вахтунда, Ажибалани зун муькъвел физва, чи Таибатаз мусибат хьайи чкадал...Ам жагъай чкадал, гила ракъинин (кьарадин) хъипи цуькверин "Рик1" экъеч1зава.