Без рубрики

 
         Дарманри х1у сих1рула
       Г1яйшат Бибалаевас 70 дус

Х1ебла барх1и ак1убси
г1янт1ик1а х1ебла сурат,
х1ябилра наб мяшт1дилзан
далгунти исму-сипат.

Г1якьлу-дагьри, пасих1деш,
Даибти сар букьурли,
къуллукъра даражара
сархири, х1у рузули.

Муирала т1абиг1ят
сецадх1и калун вара,
Г1яламлис рурт1ахъес х1ед
сахаватдеш дурчули?

Тиришаркала ванза
сецадх1и бузиб вара,
бархьдеш гьанни рургъахъес
х1ед гъабзадеш карт1ули?

Къалипра къаралдира
кайзурси дубурланна
Бибалала Мях1яммад
савгъат сайри кьисматла.

Эльмира, Лена, Идрис --
Талих1ла ахъанайти,
Бег1лара дурхъал лиг1мат
илдачибад ак1убти.

Бек1 х1янбиубкъи, хъяша,
уруз-х1яц1си, х1ялалси,
даршал дус риубсиван,
пагьму мурхьси, пасих1си.

Г1яйшат, х1ела г1ях1дешли,
Баргиб х1янчи чумлира,
Баракатли, лиг1матли
диц1иб анкъурби чула.

Ах1ерси, х1у лерх1ели,
датли сар урк1би бахъла,
дурхъабирулри х1уни
Г1ямрула мяг1на набра.

Адамдешла ишарат,
Байрахъ - ламус-х1яяла,
Х1ялалдешла зубари,
Дарманри х1у сих1рула.