Гатун са къуз алахьай, бубадихъ галаз,
ЭкъачIнай чун сейирдиз, хуьруьвай яргъаз.
Фидайла дар жигъирдай,къурху кваз рикIик,
Рехъ къалурнай къветери, акатна вилик.
Хкаж хьанай синерал, кьил гьавадавай.
Салам ганай булахриз,гьамга яд авай.
Элкъвенай чун тIуларал, хъипи цуьк алай.
Къекъвенай чун векьера, таза чиг алай.
Хуьзвайда хьиз атанвай мугьманрин таъсиб,
Лекь къарагънай синелай, суварин сагьиб.
Гуьлуьшан тир тIебиат,умун тир гьава.
Са чкадал кьуьл ийиз, кард авай цава.
КIел хпелди хъфей ван гьатна дереда.
Хпехъанрихъ илифнай, фена бередал.
Чи виликди къаймах, мегь...гъанай няметар.
Давамзавай кьегьалри дагъви адетар.
Къатадиз чи кIвачерик женжел гурцIулар,
Алудзавайбуру хьиз чпин гагьулар.
Элуькьайбур,акуна,чун яргъа амаз,
Хуькведайла галтугна хквез чахъ галаз.
Рагъ хъфена парзадихъ,чун хуьруьз рекье.
Пашманвални,шадвални авай зи рикIе.
Беневшаяр дидедиз, вахазни дуьдгъвер,
Кьведаз кьве кIунчI хканай за сувай цуьквер..
...Шумудра а легьзеяр хтайла рикIел,
Аялвилин дуьньядихъ хьана зун цIигел.
Заз акI тир хьи буба я, тухвай тахсиркар,
А дуьньядин куьлегар,агална ракIар.