Кьур тарат1ар гъалат1 хьана,
Кутур шегьре - барбат1 хьана,
Руьгь кьадарсуз галат хьана,
Кар авачиз сивевайбур.
Рахадайла -дагъвияр я,
Чкал кьелеч1 сагърияр я.
Са руквадин багърияр яз,
Къадирсузрин мелевайбур.
Эверайдаз гьай ийида,
Мецелай мед пай ийида,
Мерд рик1 гьак1а зай ийида,
Куьтягь тежер йикьевайбур.
И арза чаз гунагь я жал,
Сад Аллагь чи панагь я жал,
Югъ - раб кумай сачах я жал,
Женнет-багъдихъ рекьевайбур?