Хинад мехка хаттараш ший хана,
Дика а, во а ханаш д1аихай...
Хьанз-м кхаьчай вейна къунахий зама,
Боландаьра г1алг1ай - Мехка дей!
Рузкъах ехка яц цар сийна лаккхал,
Ц1ийца лораяй цара шоай т1ехье.
Г1алг1айче я - бакъальг, шурал яккхал,
Х1аьтта йоаккха я цуна сийлахь ц1е!
Къонах оал ший мехках вашачунах,
Наха везаш маьрша вахачох.
Лораву из Дала, массаза, вонах,
Цу а шийна бокъона наькъаш лох.
Къонах яхар вац ший мехка воацаш,
Къонах вац ший мехка сий ца дер...
Денал да са яхаш эздел доацар
Къонах вац! Ц1е йоацаш да цу дер.
Т1ема 1азап, пхьена унзара лараш...
Ма ахийта маьрша наьха ц1ий!
"Машар" яхача дешах мах ховш бараш,
Царех ала доаг1а - "Къонахий!"
Лорабелаш г1алг1ай массе а хана
Вей духь сий ца дохкаш бахараш.
Кхи хургйий а хац къонахий зама,
"Дала доахадолд шо!" - яхалаш.
01.10.09.