Милаимдиз вегьез вилер,
Сефил циферал.
Кьери жезва хъипи пешер
Тарцин хилерал.
Элкъвез къугъваз чархар ягъиз ,
Абру кьилелай,
Мекьерикай я жал хабар,
Яраб чилеллай?!
Къекъвез ама рик1 ракъинихъ,
Нурарихъ ифей,
Куьлег акална михинихъ,
Гаталди хъфей.
Аквазвач гъетерни цава,
Гъупал хьиз вегьей.
Гара ава къайи гьава,
Рекьерни кьежей.
Эхь, хабар я - пешерикай
Жеда чилин ем,
Зи мулдин цуькверикай
Гатфарин ярж-дем.
И пешер хьиз, авахьзавай
Ич1и рекьерал,
Зи гьар са югъ къе к1вахьзава
Зулун гелерал.
Хьайиди я заз гатфарни -
Садбур пехил тир.
Ахпа хьанай рик1 зи т1арни-
Бала сефил тир.
Вил вегьейт1а за йисарлай,
Ахвар хьиз фейи,
Рази я вири йикъарлай
Къуват заз гайи.
Чизва - уьмуьр ят1ани хуш,
Къведа зи вахтни,
Я сад лагьай зун инсан туш...
Я эхиримжи…
Вуч гьар жуьре къе хиялар
Гъана пешери,
Вегьей ч1авуз зал балаяр
Таран хилери....
07.10.17