Заз к1ан хьанай алудиз вун рик1елай
Тахьай кинай зи гьиссерин есир вун.
Зайиф хьана алатнай зун рекьелай
Амазма, зи рик1е хьанва са сир вун.
Чка кьунай вуна михьи рик1е зи
Жигъир квахьнай , акъвазна вун рекье зи.
Аламатдин гьал тир туьхуьн тийидай
Къаргъиш авурт1ани , хъифин тийидай.
Сефил тир зи гьалар, гьик1 ийин алхиш
Вун ваз к1енидав, хьанвани вердиш?
Зи рик1ин т1алдикай авач ваз хабар.
Гуьгьуьл шад яз , дугурзавай на йикъар.
Жезвач, жезвач алудиз вун рик1елай
Ви гьиссери алудна зун рекьелай.
Физва вилик, хьурай лугьуз хьайивал.
Чук1уриз тум, гзафариз к1енивал.
Т1ебиатди вегьезва жив чилерал
Дегишариз вичихъ галаз зи гьални.
Масад ашукь я зи пашман вилерал
Лугьузва заз, бахтлу ая зи к1вални.
Гахце зав на чуьнуьхай зи к1енивал
Гужуналди масад твада рик1е за.
Ц1ай куьк1вена , ялавди гъай чимивал
Артух жеда, къай гьатнавай к1вале са.