Жуван дидедин къвал
Чимивал гвай к1вал
Авай туш адлай ,гуьгьуьл шаддай гьал.
Ам Ватан я хва.
Сифте вегьей кам ,
Хуьруьн гъвеч1и к!ам.
Гьава михьзавай чи Самурдин там.
Ам Ватан я , хва.
Гъвеч1и ч1аван хъвер,
Мет1ел хьайи хер.
Ахвар ширин вахт ,экуьнин сегьер
Ам Ватан я, хва.
Вун къекъвей рекьер ,
Кьурагь вац1ун кьер.
Чим гвай гад ва кьуьд гъизвай чаз мекьер
Ам Ватан я, хва.
Чи дидеяр авай сабур,
Лезги чилел гъизвай абур.
Ахвар хана ви кьеп1инихъ,вакай халис инсан авур.
АМ Ватан я, хва.
Кьакьан дагълар ва къацу ч1ур.
Пешер ат1лас , векьер махпур.
Ерияр , вун лигим авур
Ам Ватан я, хва.
Чаз михьи гьава гузвай там,
Еке тарар , назик тир хам.
Бубади хьиз нани хуьх ам
Ам Ватан я , хва.
Жегьилри ийизвай мехъер ,
Диде-буба сивеллаз хъвер.
Дагъдин адет-- ярхардай гьер
АМ Ватан я, хва.
Халкь я дуствал кьадай вине.
Гьам я винни ери-бине.
Дидеди тур зат1, ви рик1е
Ам Ватан я , хва.
Жемир , Ватан рик1ел техъвез,
Жува-жув вегьемир лекъвез.
Вердиш хьухь , Ватандихъ гелкъвез
Ам Ватан я , хва.
Девлетар бул- Каспидин гьуьл,
Нарин -Къала Дербентдин кьил
И кьил а кьил авачир чил.
Ам Ватан я, хва.
Артух хьуй ваз , инанмишвал
Гьина хъсан хьайит1ани гьал.
Хайи чилел эциг на к1вал.
Ам Ватан я, хва.