Азиз досум сен оьзюнгде билесен,
Биз болмайбыз бир-биревсюз яшама.
Ойлашмагъа тюшмей гёзел гёресен,
Юреклерден бир-биревню ташлама.
Сююв отлар юрегиме къабунгъан,
Сувукъ сувлар тёкген булан сёнмежек.
Сююв мени юрегимни къуршагъан,
Башгъа улан чечегингни уьзмежек.
Шавла яя юрегиме гёзлеринг,
Гьазир бол сен сююв чыракъ якъмагъа.
Пуршав этер биревлени сёзлери,
Къой гёзел сен бизден къырей акъмагъа.
Насип болуп яшлыгъыма гиргенсен,
Юрегиме мени къызы сингенсен.
Унутмасман сени гёзел оьлгюнче,
Сюежекмен тар къабургъа гиргинче.