Алахъзава гуьрчег ийиз зун жуван ц1арар
Абурун арадани твада, зи рик1ин гьалар.
А гьаларизни ягъда ранг гуьзел хьуй лугьуз.
Алакьайт1а, гьерекатда жуван халкьдиз гуз.
Гагь суалри батмишда зун , мад твада рекье
Жагъуриз хуш къведай гафар мана квай еке.
Гьар са ц1арц1ик маналу гаф кутаз алахъда
А кар залай гьамиша ваъ, кьериз алакьда.
Авай кар я , гьуьлуьн девлет гилани сир я.
Гевгьерар кьаз алакьай кас, халис шаир я.
Сабурдивди алахъайт1а жуван фикир гваз.
Вахт атайла жеда завай , бахтунин тум кьаз.
Михьи булахрин чешмейрай яд хъвайла ширин,
Сирнав ийиз регьят жеда, гьуьлера дерин.