Авай азият акур вахтуна,
Ишехьиз жеда кьуьзуьни жегьил.
Сад акур чIавуз кьакьан тахтуна,
Аквада адал вири жез пехил.
Чидач хьи гьар вуч хъсан ва я, пис,
Дегиш жедай са алукьдайди йис.
Вири вахтунин крар тир, дуьнья!
Гагь хийир, гагь-гагь зарар тир, дуьнья!
Гьар патахъай кар туькIвей вахтуна,
Камунин кьилиз артух жез девлет;
Пачагь хьиз хьайи чIавуз тахтуна,
Квахьай вахтунда бахтунин билет,
Жув жувакай жез балкIан хьиз кухун,
Яваш жез рахун, беденни яхун,
Гъам-хажалатдин парар тир, дуьнья!
Жегьеннемдин цIун варар тир, дуьнья!
Сад-садал ашукь жегьил руш-гада,
Кьакьан тир цава лув гузвай лифер;
Муьгьуьббатдин кваз кьун тавур къайда,
ГьакI гарув гана, чIугур кьван кефер,
Ченгияр гуьрчег акваз ярдилай,
Гъил къачуз гьар са хъсан кардилай,
Амукьдай гафар-чIалар тир, дуьнья!
Дявени чуьруьк, къалар тир, дуьнья!
РикI-вил галачиз, аватна цавай,
Къизилрив ацIай са зурба каркун;
Хъсанвилихъди, кесиб яз авай,
КIвалер-йикъарин дегиш жез акун;
Кесиб рушакай лиф хьтин гуьрчег,
Уьмуьрдин юлдаш хьайила керчег,
Алахьай экуьн ярар тир, дуьнья!
Женнетдин бахтлу нурар тир, дуьнья!
Гьибурукай вун ятIа, Сажидин?
Кьудкъадалайни артух тир яшар.
Сад я бахтуниз гъвечIи, чIехидин.
Аллагьдин патай авачтIа къаншар.
Арза-ферзедал гьат тийир гъиле,
Кьил цава, кIвачер къекъвезвай чиле.
Хкаж жез четин гурар тир, дуьнья!
Гьисабиз тежер кIарар тир, дуьнья!