Різав им дрива, молов сусіда свиням.
Недуйдаві сулаком лізли друтарі.
Про матірь так вповіли, што пропала фаза.
(Букові поліна розметані в дворі...)
Сусіда лав, а пак жону загнав в гузицю,
Ухопив лампош і побіг за мнов:
Микуло! Дай ми віллань - ідеме в пивницю
Я “індикатор” там одклав зимов!
Взяли сь ме віллань й шваблики. Не фіглі -
Требало ліпше шішак з моторуки узяти!
Там ловгер, чибря, на стіні заваджені біціглі.
А Вітя гойкать: Здоли засвіти!
І я загойкав - засвітила в воко ми педаля,
А пак біцігля “Україна” впала на хребет.
На ларму вітьова прибігла Галя.
Но чом им нараз не забрався гет?
Йой, перебач сусіде! Маш серинчу
Же дунгов “Верховина” не згримів!
Я замащений ги у кучі свинча.
Но чом им нараз не пушов домів?
Не гріх жумарков децу закусити
Кидь Удар чоловік такий дустав!
Донесла Галя... Дале мусай пити -
Бо сімдецовий “індикатор” Вітя мав!
Муцна тирклянка, дюгава як атом
Я занімів як тот Герасим што з Муму.
А Вітя щикав, лав друтарю матом.
Стемнілося – вже треба йти дому...
Зо мнов сусіда - погар вина пити.
Електрики ні є і віллань им лишив.
На поліно в потемку трафив Вітя.
Зашпотався й на зимлю зломозів.
Отколи Ружку им з двора депортовав
Мачки газдувуть – то збиточні звірі.
Забухтів сопух, коли Вітя встав,
Гиби го Путін «замочил в сортире»
Тот дух муцний непросто перебити
Ци йти до Вароша пуд мостом в туалет?
А вадь у Перечин, де годні щи робити
З букових ковбиць и пиловиня оцет.
Щи може помочи хвуст сливовиці
Кидь закусити пророснутим часноком.
Газ-маску треба мати у пивниці!
Й не запивати паленку вином...
Фивник – друтарь, хоть дуже любить матірь,
Шіковно фазу добрим людьом наладив!
І як бумбак бунчав масний тот трансформатор
Што з Вітьом нас так пудло показив.