Біров і травма на виробництві
Што за ларма на Радванці?
Цигани гнівачі –
Бо в чоло вшкалений вичур
Прийшов Біров-бачі!
Зрана в лайбику порайив
Ряндя коло плота.
А пак читаво гнав мотор,
Бо в нього робота!
На роботі го бізовно
Гаджови набили.
Бо за техніку безпеки
Чути не хотіли!
Треба Бірова почливо
Дома нащивити.
Ай пацали по-циганськи
Йому наладити…
І до Бірова буджені
Прийшли делегати.
Зачали го по-цімборськи
Востро сповідати.
Як так собі дати гичков
Пуд носом водити?
Гінджінірі неваловшні
Годні тя набити?
Хлоп шіковний, молодицю
Маєш на Радванці.
Ко пособіє на діти
Учинив циганці?
Заганьбився Біров-бачі
Такой на ся брати.
Мусів чесно як то боло
Цімборам казати:
Тулько в мене фрайирок
Ги штафеток в плоті.
А Гаврілову Олену
Люблю на роботі.
Таку дяку мам на ниї
Што й не уповісти!
Як ї виджу то не хочу
Циганські невісти.
Така красна, што м не годен
Руки удержати -
В коридорі такой зачав
Її досігати…
Я фучав як пес на гурки
Ай, псу она любить!)
Бо м не знав же моє чуство
Так мене погубить…
Ай, то боло карате…
Видко на чолови…
Сановали Бірова
Його цімборове.
Піпу масну потіговав
Мудрий Дежів-бачі.
На кониць твердо вповів –
Я на жун гнівачий:
Вшиткі біди в нас од жун
Ко тото не знає,
Тот най кіно з Будулайом
Щи раз позерає!