Вуч иер я, гатфар, ви кам, ви аваз...

Гасанова Гюзеля
Чилин деринрай кьил хкажна гегьверди -
Ам ахваркай кудна гатфар эверди -
И гуьзелвалвал  чаз бахшзавай, т1ебиат,
Гекъиг жеч вахъ гьич са зат1ни  гьакъикъат.

Жив ц1рана агакьдалди тамара,
Гатфари мел башламишда багълара,
Яваш-яваш камар вегьез къекъведа,
Лацу дуьгуьр гьар са тарцел  вегьеда...

Ч1агай свас хьиз багъ яргъалай аквазва,
Билбил тарцел манидалди рахазва,
К1анивилин гьис авайбур рик1ера,
Сейир  ийиз жеда ашкъид рекьера.

Мулдин цуьквер къведа тамун къужахдиз,
Кьил агъузна, яб гуз ц1ийи булахдиз...
Цуьквед атир чилел, цава, алемда -
Гатфарин мел майдиз гьатда лап демда...

Чубарукри мукар ийиз ч1ерейрик,
Кьалар, самар гъида кутаз  гьебейрик...
Гьа къе-пака ч1ив-ч1ивдин ван кьуд патаз...
Вуч иер я, гатфар, ви кам, ви  аваз!